Ymgyrchoedd

Arnofio i Fyw

Mae ymgyrch yr RNLI Arnofio i Fyw yn  cynnig neges syml sy’n achub bywydau: Sut bynnag rydych chi'n ffeindio’ch hun yn y dŵr, os byddwch chi mewn trafferth, Arnofiwch i Fyw.  

Arnofio i Fyw

1. Pwyswch eich pen yn ôl gyda'ch clustiau dan y dŵr  
2. Ymlaciwch a rheoli’ch anadl  
3. Symudwch eich dwylo a'ch coesau i'ch helpu i arnofio  
4. Efallai y bydd eich coesau’n suddo – mae hynny’n iawn: mae pawb yn arnofio'n wahanol  
5. Ewch ati i ymarfer arnofio mewn man sydd â goruchwyliaeth, fel pwll nofio  

Mae'r dechneg yma yn eich helpu i adennill rheolaeth dros eich anadlu ac yn rhoi amser ichi asesu'ch sefyllfa neu alw am help. Mae sioc dŵr oer yn berygl gwirioneddol yn nyfroedd Cymru drwy gydol y flwyddyn, a gall arnofio wneud y gwahaniaeth rhwng byw a marw. Ewch ati i ymarfer arnofio mewn amgylchedd diogel a rhannwch y cyngor: fe allai achub bywyd.  

Parchwch y Dŵr  

Ymgyrch ymbarél y Fforwm Diogelwch Dŵr Cenedlaethol ar gyfer ymgyrchoedd a negeseuon diogelwch dŵr sy'n wynebu'r cyhoedd yw Parchwch y Dŵr. Mae'r  ymgyrchoedd hyn yn canolbwyntio ar addysgu pobl ar sut i fwynhau'r dŵr yn ddiogel a'r camau y dylid eu cymryd mewn argyfwng. Mae Parchwch y Dŵr hefyd yn cael ei ddefnyddio i chwyddo a chroes-hyrwyddo nifer o ymgyrchoedd cenedlaethol eraill sy’n cael eu cyflwyno gan ein partneriaid.  

Un ymgyrch o'r fath yw Ffoniwch, Dywedwch, Taflwch  

Os gwelwch chi rywun mewn trafferth yn y dŵr, y ffordd orau y gallwch chi helpu yw peidio â chynhyrfu, aros ar y tir, a dilyn y canllaw achub 3 cham  

• Ffoniwch 999 a gofynnwch am y gwasanaeth cywir  
• Dywedwch wrthyn nhw am arnofio ar eu cefn
• Taflwch rywbeth atyn nhw sy'n arnofio  

Un Anadl Olaf  / Prydferthwch sy’n Lladd  

Mae ymgyrch Dŵr Cymru Un Anadl Olaf  yn cyfleu neges bwerus: efallai fod cronfeydd dŵr yn edrych yn brydferth, ond maen nhw'n angheuol. Mae peiriannau cudd, dŵr iasoer, a mannau anghysbell yn golygu bod nofio heb awdurdod yn hynod beryglus. Mae'r ymgyrch yn rhannu straeon go iawn, fel stori Reuben Morgan, i dynnu sylw at y canlyniadau trasig. Mae'n annog pobl i ddod o hyd i opsiynau nofio diogel dan oruchwyliaeth, a pharchu arwyddion diogelwch.  

Mentro’n Gall  

Mae Mentro’n Gall yn ymgyrch genedlaethol a ddechreuodd yng Nghymru ac mae'n annog pobl i gynllunio ymlaen llaw cyn mynd i’r awyr agored. Boed cerdded, padlo, neu nofio, mae'r ymgyrch yn gofyn tri chwestiwn allweddol: Oes gen i’r offer cywir? Ydw i'n gwybod rhagolygon y tywydd? Oes gen i’r sgiliau ar gyfer y diwrnod? Mae gan Gymru dirweddau trawiadol ond heriol, ac mae Mentro’n Gall yn helpu i leihau digwyddiadau a all gael eu hosgoi ac yn sicrhau profiad diogel a phleserus.  

Arfordir Clyfar  

Mae Arfordir Clyfar wedi'i lansio gan Wylwyr Glannau EF i fod yn ymgyrch dymhorol sy'n helpu pobl i gadw'n ddiogel ar hyd yr arfordir. Mae'n canolbwyntio ar beryglon cyffredin yr arfordir fel cael eich dal gan y llanw, clogwyni ansefydlog, gwyntoedd alltraeth, a fflatiau llaid cudd. Gan fod miloedd o ddigwyddiadau’n cael eu riportio bob blwyddyn, mae'r ymgyrch yn annog ymwelwyr i wirio amserau’r llanw, osgoi llwybrau byr peryglus, a chario ffôn symudol wedi'i wefru. P'un a ydych chi'n cerdded, yn padlo, neu’n crwydro, mae bod yn glyfar ar yr arfordir yn golygu cynllunio ymlaen llaw a gwybod beth i'w wneud mewn argyfwng.  

Peidiwch ag Yfed a Boddi  

Mae'r ymgyrch Peidiwch ag Yfed a Boddi gan RLSS UK yn targedu risgiau alcohol a dŵr, sy’n gyfuniad marwol. Yng Nghymru, lle mae afonydd, camlesi a llwybrau arfordirol yn aml yn rhan o lwybrau adref liw nos, mae'r ymgyrch yn annog pobl i ofalu am ffrindiau a pheidio â cherdded ger y dŵr ar ôl yfed. Mae bron hanner y boddiadau damweiniol ymysg pobl ifanc 18-25 oed yn cynnwys alcohol. Mae'r neges yn glir: cynlluniwch lwybr diogel, arhoswch gyda'ch gilydd, a #BodYnFfrind.  

Deall Peryglon Dŵr  

Dan arweiniad Cyngor Cenedlaethol y Penaethiaid Tân, mae Deall Peryglon Dŵr yn ymgyrch yn y gwanwyn sy'n codi ymwybyddiaeth o foddi damweiniol, yn enwedig mewn dyfroedd mewndirol. Yng Nghymru, lle mae afonydd, llynnoedd a chronfeydd dŵr yn boblogaidd ar gyfer hamddena, mae'r ymgyrch yn ein hatgoffa bod y rhan fwyaf o foddiadau’n digwydd pan nad oedd pobl yn bwriadu mynd i'r dŵr. Mae'n hybu cyngor ymarferol, fel Arnofio i Fyw, ffonio 999, a pheidio byth â cheisio achub rhywun ar eich pen eich hun.  

Wythnos Atal Boddi  

Mae Wythnos Atal Boddi sy’n cael ei threfnu gan RLSS UK yn un o ymgyrchoedd diogelwch dŵr mwyaf y Deyrnas Unedig. Mae’n cael ei hamseru cyn gwyliau haf yr ysgolion. Mae'n darparu adnoddau am ddim i deuluoedd, ysgolion a chanolfannau hamdden i ddysgu plant 5-15 oed sut i gadw'n ddiogel o amgylch dŵr. Yng Nghymru, lle mae chwarae yn yr awyr agored ger y dŵr yn gyffredin, mae'r ymgyrch yn helpu i bwysleisio’r Cod Diogelwch Dŵr ac yn annog pawb i gael y sgwrs am ddiogelwch dŵr. 

Diwrnod Atal Boddi'r Byd  

Mae Diwrnod Atal Boddi’r Byd, sydd wedi'i ddatgan gan Sefydliad Iechyd Byd y Cenhedloedd Unedig,  yn cael ei nodi bob blwyddyn ar 25 Gorffennaf. Mae'n alwad fyd-eang i weithredu i atal boddi, sy'n hawlio dros 236,000 o fywydau bob blwyddyn. Yng Nghymru, mae'n gyfle i fyfyrio ar drasiedïau lleol a hybu ymyriadau cydnabyddedig, fel addysg nofio ac ymarfer arnofio fel sgil achub bywyd. Mae Diogelwch Dŵr Cymru yn cefnogi'r diwrnod drwy bwysleisio ymwybyddiaeth ac annog y gymuned i gymryd rhan.  

Diogelwch Dŵr i Fforwyr Bach  

Mae Diogelwch Dŵr i Fforwyr Bach sydd wedi’i greu gan Glandŵr Cymru, yn helpu rhieni a gofalwyr i gyflwyno diogelwch dŵr i blant dan bump oed. Gydag adnoddau hwyliog fel caneuon, pypedau, a'r stori "Cwac, Dau Gam yn Ôl", mae'r ymgyrch yn gwneud diogelwch yn ddifyr ac yn gofiadwy. Yng Nghymru, lle mae teuluoedd yn aml yn mwynhau camlesi ac afonydd, mae'r dulliau hyn yn berffaith i feithrinfeydd ac ar gyfer dysgu gartref.