Tywydd poeth
Wrth i newid hinsawdd ddod â thywydd poethach i Gymru, rydyn ni’n profi tonnau gwres yn amlach. Mae'r tymheredd uchel yma yn aml yn arwain pobl i chwilio am ryddhad mewn afonydd, llynnoedd, a'r môr. Serch hynny, gall hyn fod yn beryglus. Ar ddiwrnodau pan fydd y tymheredd yn codi uwchlaw 25°C, mae nifer y marwolaethau boddi bum gwaith yn uwch nag ar ddiwrnodau oerach o gwmpas 10°C.
Beth yw'r risg?
Hyd yn oed pan fo'r aer yn teimlo'n gynnes, mae'r dŵr yng Nghymru yn dal yn oer. Gall neidio i ddŵr oer heb baratoi achosi sioc dŵr oer, adwaith sydyn a pheryglus a all arwain at foddi. Dyw llawer o bobl ddim yn sylweddoli'r risgiau o fynd i ddŵr oer heb wybod sut i gadw'n ddiogel.
Sut i leihau'r risg:
Dyma gyngor WSW:
- Peidiwch â mynd i’r dŵr oni bai eich bod yn siŵr fod hynny’n ddiogel.
- Dilynwch y Cod Diogelwch Dŵr.
- Dysgwch sut i amddiffyn eich hun rhag sioc dŵr oer—edrychwch ar ein hadran gynghorion pwrpasol.
Os byddwch chi'n cael eich hun mewn trafferth yn y dŵr, arnofiwch i fyw:
- Pwyswch eich pen yn ôl gyda'ch clustiau dan y dŵr
- Ymlaciwch a cheisiwch anadlu yr un fath ag arfer
- Symudwch eich dwylo a'ch coesau i'ch helpu i arnofio
- Mae'n iawn os bydd eich coesau’n suddo: rydyn ni i gyd yn arnofio'n wahanol
- Unwaith y bydd eich anadlu dan reolaeth, ffoniwch am help neu nofiwch i ddiogelwch.
Os gwelwch chi rywun arall mewn trafferth yn y dŵr yr haf yma, cofiwch Ffoniwch, Dywedwch, Taflwch.
- Ffoniwch 999 i gael help
- Dywedwch wrth y person sy'n cael trafferth am arnofio ar eu cefn
- Taflwch rywbeth atyn nhw sy'n arnofio, fel cylch achub, tegan chwythu, neu botel.
